Унітарнаму прадпрыемству «Свіціна-ВМК» для сытнай зімоўкі жывёлы сёлета трэба назапасіць 780 тон сена, 4700 тон сенажу і 47750 тон сіласу. Патрэбныя плошчы для гэтага ёсць. Ёсць і поўны набор спецыяльнай тэхнікі. У прыватнасці, кормаўборачныя камбайны «КВК-800», «КГ-6», трактарныя касілкі і граблі, валкавацелі, прэс-падборшчыкі, для адвозкі свежаскошанай зялёнай масы падрыхтаваны і «ПІМы». За тэхнікай замацаваны вопытныя і спрактыкаваныя механізатары. Распрацаваны і ўмовы працоўнага саперніцтва.
У дзень нашага прыезду на машынны двор сельгаспрадпрыемства там кіпела работа па падрыхтоўцы некаторых агрэгатаў, якім давядзецца шчыраваць на кармавых палетках.
Разам з выконваючай абавязкі дырэктара гаспадаркі Людмілай Пятроўнай Мамойка абыходзім корманарыхтоўчую тэхніку. Некаторая ўжо гатова, ля асобнай завіхаюцца рамонтнікі. Ля «КПР-9,0» засталі Анатоля Уладзіміравіча Асташонка і Віктара Мікалаевіча Дарожку.
– Апошнія прыгатаванні заканчваю і сёння ж адпраўляюся на падкос пашавых угоддзяў, – гаворыць Анатоль Уладзіміравіч. – Тэхніка ў мяне і сапраўды высокахуткасная. Ёй разгон патрэбны ды роўнае поле, каб паказаць сапраўдную выпрацоўку.
– Гэта так, – згаджаецца Віктар Мікалаевіч Дарожка, якому на сёлетняй касавіцы давядзецца працаваць на трактары «МТЗ-1221» у агрэгаце з «КДН-2,7».
– Гэта нашы лепшыя механізатары, – уступае ў гутарку Людміла Пятроўна. – На адвозцы зялёнай масы з поля і дастаўцы яе да траншэй таксама будуць заняты Сяргей Іванавіч Каралёў, Фёдар Фёдаравіч Заяц. Вось яны перад вамі. Працавітыя і сумленныя гэта трактарысты. Спадзяюся на іх выніковую работу. Хачу назваць яшчэ аднаго механізатара, які таксама будзе прымаць непасрэдны ўдзел у касавіцы. Гэта Вячаслаў Васільевіч Дуран. Ён на сваім новым «МТЗ-82» будзе нарыхтоўваць рулоны з сенам. Свой прэс-падборшчык ён ужо падрыхтаваў да работы. Словам, да касьбы траў мы ўсе настроены рашуча і па-баявому.
– Ці ёсць для гэтага падставы ў свіцінцаў? – пацікавіўся ў намесніка начальніка ўпраўлення райсельгасхарчу па механізацыі М. В. Кавалёнка.
– Усе падставы для хуткай і якаснай уборкі траў у гэтага сельгаспрадпрыемства ёсць, – адказаў Міхаіл Віктаравіч. – Тэхніка ў іх практычна гатова да выезду ў поле. Астатняе – за механізатарамі.