Адно з важных пытанняў у рабоце аграпрамысловага комплексу раёна – падрыхтоўка сельскагаспадарчых арганізацый да зімова-стойлавага перыяду.
Пэўная работа па навядзенні парадку і падрыхтоўцы малочнатаварных ферм, комплексаў і памяшканняў для ўтрымання жывёлы вядзецца ўжо зараз і паэтапна. Спачатку – ачыстка ад рэшткаў кармоў і гноевыдаленне, затым – рамонт падлогі або даху, варот і іншага. Заключны этап – дэзынфекцыя і пабелка.
– Так, з 45 памяшканняў у 30 дэзынфекцыя ўжо праведзена,– паведаміла рэдакцыі намеснік дырэктара ДЛПУ “Бешанковіцкая раённая ветстанцыя” М. У. Глінская. – З 91 цялятніка дэзынфіцыраваны і пабелены 86. У дадзены момант ідзе пераабсталяванне памяшкання фермы “Камоскі” з прывязнога ўтрымання дойнага статка на беспрывязное. Разам з тым вядзецца ачыстка, рамонт і дэзынфекцыя збожжасховішч. Падрыхтаваны 30 з 54 складоў.
Дэзынфекцыя пачалася ў другой палове чэрвеня. Наша лабараторыя правярае яе якасць. Калі ёсць неабходнасць, праводзім паўторную дэзынфекцыю. Час яшчэ ёсць, да верасня ўсё будзе зроблена. Думаю, што зіму сустрэнем у поўным узбраенні.
