Радасна назіраць, як на нашых вачах новае аблічча набывае Бешанковіцкая дзіцячая школа мастацтваў. Хоць рамонтныя работы тут ідуць не так хутка, як хацелася б (прычына таму – адсутнасць дастатковай колькасці фінансавых сродкаў), яны ўсё ж не спыняюцца, а ўпэўнена рухаюцца наперад.
На рэканструкцыю ўстанова адукацыі была зачынена вясной гэтага года. На сённяшні дзень работнікі КБУП «Бешанковіцкая ПМК-41» ужо цалкам завяршылі будаўніцтва даху, заканчваюць усталяванне ўнутраных перагародак, падлог, правялі вадаправод і каналізацыю, цяпер будаўнікі займаюцца ўладкаваннем санвузлоў, прыступілі і да электрыкі. Дарэчы, навучальны працэс, нягледзячы на тое, што ў будынку школы вось ужо больш за паўгода замест крэслаў для гледачоў – будаўнічыя лясы, а замест музыкі – шум тэхнікі, не спыняўся ні на дзень.
Па словах намесніка дырэктара па вучэбна-выхаваўчай рабоце ДШМ Г. М. Казаковай, вымушанае «перасяленне» педагогам і іх выхаванцам далося нялёгка. Але трэба адзначыць, што да змены абстаноўкі дзеці і іх бацькі паставіліся з разуменнем. Бо школа, будынак якой з’яўляецца помнікам архітэктуры пабудовы канца XVII – пачатку XVIII стагоддзя, мела патрэбу ў рамонце даўно.
– Мы выказваем велізарную падзяку ўсім, хто даў нам часовы прытулак, – адзначае Галіна Мікалаеўна. – Сёння нашы выхаванцы (а іх усяго больш за 250 чалавек) займаюцца ў памяшканнях СШ №1 і №2 райцэнтра, раённага цэнтра культуры, ДЮСШ, нядзельнай школы пры Свята-Ільінскай царкве, цэнтральнай раённай бібліятэкі, дома фальклору. Так як заняткі праводзяцца ў асноўным у цэнтры гарпасёлка, недалёка ад нашай школы, нам удалося не «згубіць» навучэнцаў.
Дарэчы, з адкрыццём школы пасля рамонту адміністрацыя звязвае вялікія планы. Напрыклад, мяркуецца дадаткова арганізаваць заняткі па харэаграфіі для дарослых (для гэтага ствараюцца ўсе ўмовы, у прыватнасці, пасля напружаных трэніровак наведвальнікі змогуць скарыстацца душавымі, іх тут будзе дзве), ёсць і іншыя задумкі. А пакуль рэканструкцыя працягваецца. «Зара» будзе трымаць сваіх чытачоў у курсе ходу рамонтных работ.
Святлана ВАРОШКА.
