Міністэрства сельскай гаспадаркі і харчавання вывучае варыянты зніжэння затрат у сельскай гаспадарцы — ад прымянення розных відаў апрацоўкі глебы да новых спосабаў уборкі ўраджаю, паведаміў карэспандэнту БЕЛТА начальнік галоўнага ўпраўлення тэхнічнага прагрэсу і энергетыкі, дзяржаўнага нагляду за тэхнічным станам машын і абсталявання Мінсельгасхарча Станіслаў Карповіч.
Станіслаў Карповіч падкрэсліў, што ў рэспубліцы наладжана эфектыўнае ўзаемадзеянне з вытворцамі і вучонымі. Як вынік: у краіне выпускаецца 87 працэнтаў усяго парку тэхнікі, неабходнай для ўборкі ўраджаю, у той час як у пачатку 1990-х гадоў лічба не перавышала 13 працэнтаў. «У Беларусі 90 працэнтаў збожжаўборачных камбайнаў — айчыннай вытворчасці, трактароў — 96 працэнтаў, — адзначыў ён. — За гэтыя гады настолькі рушылі наперад, каб забяспечыць практычна сваю тэхналагічную незалежнасць».
Сёння на адным з палёў паблізу гарадскога пасёлка Мір спецыялісты ведамства ацанілі на практыцы ўборку гароху збожжавым падборшчыкам ПЗ — 3.4 вытворчасці холдынга «Гомсельмаш». Методыка для аграрыяў эксперыментальная. Гаспадаркі пакуль выкарыстоўваюць камбайны са жняяркай, дзе ідзе зрэзванне раслін. Варыянт, які прапануецца, — больш эканамічны, не патрабуе скошвання пасеваў. Выконваецца меншая колькасць тэхналагічных аперацый. «Канструктары прадугледзелі магчымасць хутка і без страт убіраць бабовыя. Эксперымент паказвае: такому спосабу быць. Падборшчык метадам ачэсвання вырывае расліну і абмалочвае. Спосаб самы просты. І эфектыўны», — адзначыў Станіслаў Карповіч.
Яшчэ адно новаўвядзенне — безадвальная апрацоўка глебы. Такую тэхналогію прадставілі Прэзідэнту ў час яго нядаўняй рабочай паездкі ва ўсходнія рэгіёны краіны. «Каб зменшыць затраты, сабекошт выпускаемай прадукцыі, з вучонымі напрацоўваем вопыт прымянення розных відаў апрацоўкі глебы, у тым ліку выкарыстоўваем безадвальную апрацоўку. У гэтым бачым вялікі эканамічны эфект. Машыны для гэтых мэт у краіне выпускаюцца», — дадаў Станіслаў Карповіч.
У прыклад ён прывёў Гродзенскую вобласць — на мяжы Шчучынскага і Мастоўскага раёнаў пры такой тэхналогіі (глыбокае рыхленне і сяўба) на глебах з нізкай бальнасцю атрыманы ўраджай рапсу 65 ц/га пры няпростых умовах надвор’я.
Як паведамлялася БЕЛТА, 12 жніўня Аляксандр Лукашэнка наведаў сялянскую фермерскую гаспадарку «Старт ТС» у Аршанскім раёне, дзе на прыкладзе аднаго з палёў паглядзеў тэхналогію безадвальнай апрацоўкі глебы. Гэта пытанне Прэзідэнт абазначыў як стратэгічнае і даў даручэнне на практыцы вывучыць вопыт, каб у наступным годзе зрабіць канчатковыя вывады. «Нам не прамахнуцца б. Галоўнае, каб мы атрымалі ўраджай. Я думаю, што першы год трэба паспрабаваць. Палавіну так пасеяць, а палавіну пры звычайным ворыве, — звярнуўся Прэзідэнт да кіраўніцтва гаспадаркі. — Будзем спрабаваць тут. У добрых гаспадарках — там, дзе ўжо вопыт ёсць, безадвальная апрацоўка глебы і сяўба па ржышчы — гэта добры варыянт. Але трэба, асабліва на поўначы, усходзе, акуратна да гэтага падыходзіць».-0-
Фота Віталя Піваварчыка
