Насычанае падзеямі і творчымі ўзлётамі культурнае жыццё землякоў. Абласны конкурс аркестраў народных інструментаў «Спяваем з аркестрам», што прайшоў у Шуміліне, прынёс сваю хвілінку славы бешанкавічанам.
Конкурс праводзіўся з мэтай папулярызацыі і развіцця інструментальнага жанру, павышэння ўзроўню выканаўчага майстэрства ўдзельнікаў аркестравых калектываў і папаўнення рэпертуару. Удзел у ім прынялі 28 творчых калектываў устаноў культуры і адукацыі Віцебшчыны з найменнем «народны», «узорны», а таксама калектывы без наймення. Як адзначыла журы, многія аркестры прадэманстравалі высокі выканаўчы і мастацкі ўзровень.
Нашы землякі абаранілі гонар роднага краю і паказалі сябе годна. Узорны аркестр народных інструментаў ДУА «Бешанковіцкая дзіцячая школа мастацтваў» у намінацыі «Лепшы аркестр народных інструментаў» стаў лаўрэатам ІІ ступені. У гэтай жа намінацыі лаўрэатам І ступені прызнаны народны аркестр народных інструментаў ДУК «Бешанковіцкі раённы Цэнтр культуры» і лаўрэатам ІІІ ступені — у намінацыі «Лепшая дэкламацыя».
«Аркестр — гэта вялікі жывы арганізм, дзе кожны інструмент мае сваю функцыю, сваю ролю. Калі ўсе яго ўдзельнікі ўкладуць у агульную справу часцінку душы і таленту, будзе і вынік, — падкрэслівае кіраўнік аркестра Алена Ядрэўская. — Вялікі дзякуй, землякі, кожнаму з вас. За тое, што знайшлі час для рэпетыцый, любіце музыку і маеце жаданне ўдасканальваць сваё майстэрства!»
Віншуем з перамогай і мы! Наперадзе яшчэ нямала конкурсаў, поспехаў вам, землякі, у дасягненні творчых вышынь!
Марыя САНЬКО.
