Колькасць i якасць — тое, што падчас нарыхтоўкi кармоў ставяць на першае месца аграрыi раёна. На Бешанковiччыне гэты працэс ідзе поўным ходам. Ад назапашаных у пару траў залежыць аб’ём вытворчасці жывёлагадоўчай прадукцыi. Як трэба працаваць, паказвае вопыт СУП «Свіцiна-ВМК», дзе першы ўкос ужо на фінішнай прамой (95,7%).
У гаспадарцы запланавана нарыхтаваць 270 т сена, 7936 т сенажу, 7113 т сіласу. Па дадзеных на ўчарашнюю раніцу, працаўнікі ўбралi 7969 т зялёнай масы. Значную ўвагу тут надаюць і закладцы кармоў у палімерную плёнку. Гэта задача даручана вопытнаму працаўніку: Вiктар Мiкалаевiч Дарожка ў сферы сельскай гаспадаркі больш як тры дзесяцігоддзі шчыруе. Мае ордэн «Знак пашаны», яго прозвiшча ўпрыгожвала раённую Дошку гонару. Ды i штогод механiзатар у лiку лепшых руплiўцаў сельгаспрадпрыемства. «Бацька Вiктара Мікалаевіча працаваў начальнікам участка ў калгасе імя Калініна, прыклад яго працавітасці бачыў і сын, — расказвае пра механiзатара дырэктар гаспадаркi Людмiла Пятроўна Мамойка. — Такiх работнікаў яшчэ пашукаць трэба! Сярод калег карыстаецца павагай, бо шчырай працай заваяваў аўтарытэт. Працуе з касілкай «КДЛ‑2,7», прэс-падборшчыкам i «РУ‑1000» на ўнясеннi ўгнаенняў (падкормка азімых увесну), на «СЗТН‑4М» падсяваў травы. Ён з тых, каму любы фронт работ можна даручыць. Зараз заняты нарыхтоўкай сенажу ў плёнку». Такiя шчырыя словы ўдзячнасці за працу, яе высокай ацэнкі кiраўнiк знаходзiць для кожнага работніка.
Адказна і старанна з раніцы і да позняга вечара працуе корманарыхтоўчы свiцiнскi атрад. На «КВК‑800» шчыруе Аляксандр Аляксандравiч Воранаў. Галоўны касец — Юрый Аляксеевiч Любачка i яго «МТЗ‑3522» з «КПР‑9». Адвозяць «зялёнку» Юрый Рыгоравiч Галай на «МТЗ‑3022» з «ПСТБ‑17», Уладзiмiр Уладзiмiравiч Бяляўскi на «МТЗ‑1221» з «МТУ‑20», Андрэй Уладзiмiравiч Шчука працуе на «МТЗ‑1221» з «ГВ‑6,2». Трамбоўка правяленай масы — задача Iвана Аляксеевiча Чачанца i яго «Амкадора‑352».
— Механізм корманарыхтоўкі працуе, як гадзіннік, — кажуць мужчыны. — Надвор’е спрыяе, тэхніку імкнуліся рыхтаваць якасна. З заданнем справімся, іначай і быць не можа.
Як вядома, на працаздольнасць і настрой людзей, занятых любой справай, уплывае тое, наколькі смачна і сытна яны пад’елі. Свіцінцы, занятыя на палявых работах, меню і смакавымі якасцямі абедаў задаволены. Арганiзуе для iх двухразовае гарачае харчаванне Ала Мікалаеўна Шут.
Ад працэсу нарыхтоўкі кармоў у найбліжэйшыя дні залежыць работа жывёлагадоўлі ў будучым. Кожны разумее, нельга зацягваць касавіцу. Травы перастаяць і страцяць частку пажыўнай каштоўнасці. А гэта раўнацэнна недабору малака і мяса. Калi ж будуць кармы ў дастатковай колькасці і якасныя, будуць і надоі, і прывагi, і зарплаты.
Марыя САНЬКО.
