Уборачная кампанія – самая любімая пара ў вяскоўцаў. Сельгаспрадпрыемствы выводзяць на палеткі камбайны, толькі і чуецца, як ракочуць маторы. Азірнуцца не паспееш, як у хуткім часе будуць браць запаветныя тысячныя рубяжы. На мінулым тыдні мы зазірнулі да рупліўцаў КСВУП «ПалітаддзелецАгра», якія пачалі ўбіраць рапс і ячмень.
Усяго збожжавых і зернебабовых у гаспадарцы 2056 га, у тым ліку 349 га азімага жыта, 23 га трыцікале, 583 га азімай пшаніцы і 54 га – яравой, 391 га яравога ячменю, 346 га аўса, 120 га зернебабовых. На момант візіту палітаддзельцы ўбралі 10 га азімага ячменю (згодна з планам яго – 190 га), намалацілі 23 т, сярэдняя ўраджайнасць – 23 ц/га. А таксама 18 га рапсу (з 350 га), намалацілі 12 т ураджайнасцю 6,7 ц/га.
На рапсавым полі шчыруе Алег Марціновіч.
Збіраць ураджай – справа, якую даручаюць самым-самым працаўнікам. Напрыклад, Алег Міхайлавіч Марціновіч, які на «МТЗ‑3022» нядаўна займаўся адвозкай зялёнай масы, цяпер – за штурвалам камбайна. Разам з ім гэту адказную місію выконваюць Яўген Віктаравіч Апатаў і Сяргей Аляксандравіч Радкевіч. На адвозцы збожжа задзейнічаны Пётр Мікалаевіч Піўчэўскі, Мікалай Пятровіч Надзёжка і Віктар Іванавіч Апатаў. На зернесушыльнай устаноўцы працуюць аператары Аляксандр Валер’евіч Калугін, Сяргей Дзмітрыевіч Капусцін, дапамогу тут гаспадарцы аказвае і Дзмітрый Леанідавіч Варонін з УКП ЖКГ «Бешанковіцкі камунальнік».
З камбайнерам Алегам Марціновічам сустрэліся на полі ля вёскі Берасні. Настрой у механізатара радасны.
«Нарэшце, – кажа Алег Міхайлавіч, – дачакаліся пары, калі можна скокнуць у кабіну і павесці «бітву» за ўраджай. Малоціш, як па моры на караблі плывеш. Вецер гуляе, збожжа, нібы хвалі. Прыгожа».
Як жа не працаваць адказна, калі вакол такая краса і любімая прырода? Абеды механізатарам заказваюць у рэстаране і дастаўляюць на поле. Адносяцца да рупліўцаў з павагай. Яны ж за гэта аддзячваюць працай. Не за гарамі ўжо час, калі на поўную моц запрацуе хлебны канвеер, а там і высокія намалоты, і новыя перамогі!
Марыя САНЬКО.
