У бешанковіцкіх аграрыяў працягваюцца напружаныя дні. Сельгаспрадпрыемствы раёна прыступілі да ўборкі адной з галоўных кармавых культур, якую справядліва называюць «царыца палёў». У цэлым па раёне ўбралі 453 га з 3893, што складае 11,64% ад плана. Здрабнілі 14314 тон зялёнай масы ўраджайнасцю 316 ц/га. Першымі ўбіраць кукурузу пачалі рупліўцы КСВУП «ПалітаддзелецАгра» і СУП «Вядзерава». Наступнымі да справы далучыліся ТАА «Сушчова-Агра» і СУП «Свіціна-ВМК».
Днямі мы сустрэліся з вядзераўскімі працаўнікамі. На іх рахунку — 83 га (з 501, ці 16,6%), нарыхтавалі 2194 т зялёнай масы, сярэдняя ўраджайнасць якой — 264,3 ц/га. За сваю «царыцу палёў» вядзераўцы ўзяліся напрыканцы жніўня. Гэту адказную справу даручылі Сяргею Сяргеевічу Бутанаву і яго «КВК‑800». На дапамогу працаўніку прыйдзе Алег Рыгоравіч Чунаеў. Адвозкай зялёнай масы займаюцца Ігар Мікалаевіч Быкоўскі на «МАЗе», Павел Аляксандравіч Цяцерыч на «МТЗ‑82», Віталь Аляксандравіч Гайдукоў на «МТЗ‑1221», Мікіта Анатольевіч Быкаў з СФГ «Панскі двор». Надзейнае плячо на адвозцы падстаўляюць і іншыя рупліўцы, ім добра вядома справа земляроба. На трамбоўцы шчыруюць Леанід Фёдаравіч Іваноў і Аляксандр Рыгоравіч Сіроткін.
Працоўны дзень пачынаюць раніцай, завяршаюць — прахалодным восеньскім змярканнем і кожную хвіліну цёплых вераснёўскіх дзянькоў шануюць! Кукуруза сёлета ўдалася і здзіўляе як вышынёй, так і ўраджайнасцю. На полі, дзе размаўлялі з вядзераўскімі механізатарамі, культура вырасла шыкоўная, месцамі ў ёй ледзь віднелася кабіна «КВК». Настрой на працу выдатны, надвор’е цудоўнае, добры і ўраджай. Значыць, усё ў хлопцаў атрымаецца. Галоўнае — каб тэхніка не падвяла!
Лідарам па ўраджайнасці кукурузы ў раёне з’яўляецца КСВУП «ПалітаддзелецАгра» — 466 ц/га, працаўнікі гаспадаркі ўбралі 115 га з 950 запланаваных, ці 12,1%, здрабнілі 5361 т зялёнай масы кукурузы. Працаўнікі ТАА «Сушчова-Агра» ўбралі 240 га з 530, што складае 45,3%, назапасілі 6407 т ураджайнасцю 267 ц/га. Свіцінцы ўзяліся за ўборку кукурузы нядаўна (15 га з 471, ці 3,2%), аднак на іх рахунку ўжо 352 т, сярэдняя ўраджайнасць культуры — 234,7 ц/га.
Аграрыі раёна, па дадзеных на ўчарашнюю раніцу, назапасілі на адну ўмоўную галаву 19,54 ц карм. адз. Першую пазіцыю займае ТАА «Сушчова-Агра» — 46,64 ц карм. адз., затым палітаддзельскія рупліўцы (20,42), наватарцы (17,19) і свіцінцы (16,25).
Марыя САНЬКО.
