Сям’я… Для кожнага чалавека гэта паняцце звязана з чымсьці родным, цёплым, надзейным. Менавіта тут цябе любяць такім, які ты ёсць, заўсёды чакаюць, шчыра радуюцца тваім поспехам і разам перажываюць няўдачы. Цудоўна, калі атрымліваецца стварыць такую сям’ю, дзе кожнаму добра. Але для гэтага трэба папрацаваць. Залатое правіла сямейнага жыцця – быць цярплівым і паблажлівым. Так кажуць мудрыя людзі. Не пагадзіцца з гэтым нельга, як і з тым, што стварэнне сям’і – адказны крок у жыцці кожнага чалавека.
Напярэдадні свята мы наведалі тых, для каго сям’я – не частка жыцця, а само жыццё. Ганна і Генадзь Кавалёнкі разам з дзецьмі жывуць у Бешанковічах. Будучыя муж і жонка пазнаёміліся падчас дня нараджэння іх агульнага сябра. Пачуцці ўзніклі адразу. Як кажуць: каханне з першага погляду.
– Я адразу зразумела, што Гена – мой лёс, – расказала Ганна. – Ён даказаў мне шчырасць сваіх пачуццяў, чым мяне і заваяваў.
Сваю вернасць даказала і Ганна. Дзяўчына чакала будучага мужа з войска, а пасля яго вяртання пачуцці сталі яшчэ мацней. У хуткім часе было вырашана згуляць вяселле. Ужо тады маладыя людзі вырашылі, што дзяцей у іх будзе шмат, нават імёны сваім дочкам (марылі толькі пра дзяўчынак) прыдумалі загадзя. У Ганны перад вачыма заўсёды быў жывы прыклад вялікай, дружнай і мірнай сям’і – яна сама з такой.
– Хачу сказаць, што кожная сям’я куе шчасце сваімі рукамі, – адзначыла шматдзетная маці. – Калі няма згоды, што гэта за сям’я?
За магчымасць мець такую моцную ячэйку грамадства і кожны дзень адчуваць радасць мацярынства Ганна ўдзячная свайму мужу. Захавальніца сямейнага ачага прызналася, што, калі б яна не адчувала ад каханага падтрымку, апору і моцнае мужчынскае плячо, магчыма, лёс склаўся б інакш. У Кавалёнкаў ёсць свае традыцыі: яны вельмі любяць прымаць гасцей, ладзіць святы, адпачываць на прыродзе.
А дзеткі ў нашых герояў выдатныя! Старэйшая Паліна вучыцца ў 4 класе, разумніца, актывістка, удзельніца розных школьных алімпіяд. Дзяўчынка шмат у чым дапамагае маме: і за малодшымі паглядзіць, і посуд памые. Сярэдняя Соф’я яшчэ першакласніца, але ні ў чым не адстае ад старэйшай сястры. Такая ж разумніца, а яшчэ і рукадзельніца. Усе ў маці. Тры месяцы таму сям’я стала больш: нарадзілася Варачка.
Любое пытанне тут вырашаецца разам, мама з татам для дзяцей – самыя верныя сябры, якім давяраюць свае сакрэты, дзеляцца поспехамі і дасягненнямі.
Пра жыццёвыя цяжкасці муж і жонка не расказваюць. Кажуць, што ўсе хатнія клопаты ў радасць.
– Як і ў кожнай сям’і, у нас таксама ёсць запаветная мара… Прасторны дом, – падзялілася Ганна. – Мы будзем прыладжваць усе намаганні для рэалізацыі задуманага, і я ўпэўнена, што ўсё ў нас атрымаецца.
Кацярына ПЕТУХОВА.
