Да пятага Усебеларускага народнага сходу засталося менш за тыдзень. Круг дэлегатаў, якія паедуць на найважнейшы грамадска-палітычны форум для прыняцця важных дзяржаўных рашэнняў, самы шырокі: ад кіраўнікоў да простых рабочых.
У іх ліку і наша зямлячка – Любоў Аркадзьеўна Дзеравяга, намеснік дырэктара па вучэбнай рабоце СШ №2 г. п. Бешанковічы. Яе працоўны стаж у сферы адукацыі складае 17 гадоў. Вучылася Любоў Аркадзьеўна ў БДУ на гістарычным факультэце. Такую прафесію яна абрала таму, што хацела быць падобнай на сваю настаўніцу гісторыі Аксану Ігнацьеўну Асаевіч. Мара спраўдзілася, і сёння Л. А. Дзеравяга адбылася як прафесіянал у сваёй справе. Мы сустрэліся з Любоўю Аркадзьеўнай, каб пацікавіцца: што чакае педагог ад маючага адбыцца народнага веча, і якія тэмы будуць ёй найбольш цікавыя?
– Такая форма народаўладдзя, як Усебеларускі народны сход, арганічна ўпісваецца ў палітычную сістэму беларускай дзяржавы, аснова якой – вызначэнне асноўных напрамкаў і параметраў развіцця рэспублікі, выпрацоўка плана эканамічнага і сацыяльнага развіцця краіны на будучы пяцігадовы тэрмін, – кажа Л. А. Дзеравяга. – Прынцыповы ўлік меркаванняў людзей, мэтанакіраваная праца па рэалізацыі іх пажаданняў дазваляюць кожнаму з нас рэальна адчуваць сябе грамадзянінам Беларусі ў поўным сэнсе гэтага высокага звання.
Безумоўна, гэта ганаровая місія і вялікая адказнасць – прадстаўляць Бешанковіччыну на Усебеларускім народным сходзе, які, без перабольшвання, з’яўляецца вышэйшым форумам краіны. Таму я б хацела сказаць словы ўдзячнасці ўсім землякам, якія падтрымалі маю кандыдатуру ў якасці дэлегата. Пры гэтым я разумею і ўсю адказнасць, паколькі ўсяго 5 чалавек ад нашага раёна паедуць на народнае веча.
Пра што будуць гаварыць? Думаю, пра самае надзённае, пра тое, што сёння з’яўляецца топавымі тэмамі ў мас-медыя: інавацыі, высокія тэхналогіі, экспарт і інвестыцыі, развіццё малога і сярэдняга бізнесу, аднаўленне тэмпаў эканамічнага росту, словам, пра базу, на якой мяркуецца забяспечыць якаснае развіццё нашай эканомікі ў 2016-2020 гадах.
Упэўнена, што на чарговым усенародным форуме будзе абмяркоўвацца і шмат пытанняў, якія датычацца сістэмы адукацыі Рэспублікі Беларусь, яе мадэрнізацыі і далейшага развіцця. Мабыць, хацелася б абмеркаваць на Усебеларускім народным сходзе ролю педагога ў сучасным грамадстве. Бо сёння перад намі пастаўлена задача – стварыць умовы для якаснай адукацыі і павышэння ўзроўню ведаў вучняў. Думаю, мы з гэтай прыярытэтнай задачай справімся. А яшчэ хачу пажадаць дабра нашаму агульнаму дому – Рэспубліцы Беларусь!